جدید پنجابی کلام
کی چھٹے کوئی کی رولے
خالی ہو گئے پیار پڑولے
سدراں دل دیاں دل وچ رہیاں
غرضاں ہر پاسے منہ کھولے
دل دُکھاں نے پتھر کیتا
اکھیاں نے نہ اتھرُو ڈولے
ٹُر گئے یار محبتاں والے
کس نال کوئی دُکھ سُکھ پھولے
جنہاں باج نہیں پل سی لنگدا
مٹی ہو گئے، مٹی اولے
سوہنیاں صُورتاں نظر نہ آون
دل وچ اُٹھن واء ورولے
اے ویلا وی اساں سی تکنا
کوئی پُچھے، نہ کوئی بولے
یار سعید اوکھا اے پینڈا
شاماں پے گیاں، دل ڈولے
ارشد سعید
No comments:
Post a Comment
Note: only a member of this blog may post a comment.