جدید پنجابی شاعری
چڑھیا چیتر ۔۔۔۔۔
چڑھیا چیتر لگراں پُھٹیاں پر نہ ہاسے پُھٹے
من دی رُت نوں تن دے سوکے اکھیوں کاسے پُھٹے
بُھکھی رُوح دی کُکھوں وحشی، بھکھے، پیاسے پُھٹے
تاہیوں ساڈے ویہڑے پھٹے جو اکواسے پُھٹے
چڑھیا چیتر ۔۔۔۔۔
چڑھیا چیتر لگراں پُھٹیاں آساں ہریاں ہوئیاں
شالا چھیتی رنگ لیاون پِیڑاں جریاں ہوئیاں
چنگی جیونے اٹھن سبھے سدھراں مریاں ہوئیاں
سوچاں دے گل گُھٹ نہ دیون عقلاں ڈریاں ہوئیاں
چڑھیا چیتر ۔۔۔۔۔
چڑھیا چیتر لگراں پُھٹیاں رکھاں بانے بدلے
رُت بدلدی ویکھی تے سب لوک سیانے بدلے
ساڈا اپنے آپ نوں دھوکھا، اپنے بھانے بدلے
کجھ بدل نہیں ہونا جے نہ پیٹے تانے بدلے
چڑھیا چیتر ۔۔۔۔۔
صابر علی صابر
No comments:
Post a Comment
Note: only a member of this blog may post a comment.