جدید پنجابی شاعری
آپاں آپ ای عیب اینہاں دے کجے نیں
تاں تے راکھے گیڈاں وانگوں رجے نیں
جس دی خاطر انکھاں داء تے لا چھڈیاں
بھورا لج نہ پالی اس بے لجے نیں
مڑ مڑ آپ ای چور مسلط کردے رہے
مننا پئے گا ساڈے کم کچجے نیں
کئیاں اپنی پھوں پھاں دے وچ مر جانا
جیون گے اوہ جہیڑے یار سچجے نیں
خیر کرے رب دھرتی دے وسینکاں دی
ہن فر لہندے ولوں بدل گجے نیں
آزادی دا کسراں جشن منائیے یار
ایتھے سوچاں قیدی ، سنگل وجے نیں
ورھیاں بعدوں ایس نتیجے اپڑے آں
زاہد جان دے ویری کھبے سجے نیں
زاہد صدیقی
No comments:
Post a Comment
Note: only a member of this blog may post a comment.