جدید پنجابی سرائیکی شاعری
یاداں
جڈاں ہتھ دیاں گھڑیاں نہن ہوندیاں
جڈاں عرش تے گھڑیاں لگدیاں ہن
جڈاں تارے وقت ڈسیندے ہن
کھتیاں تے دھمیاں دھمدیاں ہن
جڈاں کانے پور کے چٹکے تے
ایں وقت دے نہڑ لگدے ہن
جڈاں وستی بانگ جو آوے ہا
وستی دیاں دھیاں مائیاں دے
کن تے آواز جو پووے ہا
او سارے کم کوں چھوڑین ہا
پہلے سر تے بوچھنڑ جوڑین ہا
جڈاں پانڑ پڑوپیاں ٹوپے ہن
جڈاں اٹھڑے ڈلے پوپے ہن
جڈاں لیپے لاڑیاں چوپے ہن
جڈاں بوھلڑ ہن جڈاں ٹھولے ہن
جڈاں اماں سئنڑ دی چنی دے
کھٹ نال اڈے ہوئے جھولے ہن
جڈاں ماء رڑکا رڑکیندی ہئی
کوئی بال جو نالوں گزرے ہا
اے اکثر گالھ کریندی ہئی
میڈا پتر نصیب دا ماڑا ہے
ایندا پوکھوں تاں بہوں بارا ہے
جڈاں ہتھ دیاں چکیاں ہوندیاں ہن
اوں ویلے غیر دیاں دھیاں وی
ساڈے دھیاں سکیاں ہوندیاں ہن
جڈاں دور ہا کانہہ دے تروئے دا
ہا ڈیڈھیاں آلے بوہے دا
گاں منجھ دے پہلے سوئے دا
حضرت عباس دے تھلے تے
جڈاں نیاز دا کھیر وڈیندا ہا
ہر شیعہ سنی پیندا ہا
جڈاں چونک تے ماچے لگدے ہن
اوں ویلے پیئو دے سینگھے وی
ساکوں سکے چاچے لگدے ہن
جڈاں در تے چھکوں ہوندیاں ہن
تڈاں ملنڑ دیاں سکوں ہوندیاں ہن
مضطر کاظمی
No comments:
Post a Comment
Note: only a member of this blog may post a comment.