جدید پنجابی سرائیکی شاعری
چار اپریل یوم شہادت ذوالفقار علی بھٹو
سولی سجانوی ہے نوبت وجانوی ہے
جیون دی جوگ سانگے دھرتی جگانوی ہے
قاتل کوں اے خبر ہئی سچ کوں لُکانوی سگدا
سینے تے اپنے کوڑے تمغے سجانوی سگدا
پھلیں کوں قید کر تے خُشبو لُکانوی سگدا
نسلیں کوں نور ملسی چیتے چتانوی ہے
جیون دی جوگ سانگے دھرتی جگانوی ہے
خابیں دے خیمیاں تے شام غریباں راہوے
من وچ متام ہونون اکھیاں توں ہنج نہ ڈھاوے
سچ کوں صلیب چاڑھے سُولی توں سجھ نہ لاہوے
کوئی کیا مکان ڈیوے چودھار چھانوی ہے
جیون دی جوگ سانگے دھرتی جگانوی ہے
سندھڑی سہاگ بوچھن دھرتی دا ڈاج بن گے
بھٹو دلاں دا وسدا روح دا رواج بن گے
اوکوں یاد کر کے رونون مخلص مزاج بن گے
پلکیں تے پینگھ ہنج دی ساڈی تاں سانوی ہے
جیون دی جوگ سانگے دھرتی جگاوی ہے
سولی سجانوی ہے، نوبت وجانوی ہے
جہانگیر مخلص
No comments:
Post a Comment
Note: only a member of this blog may post a comment.