جدید پنجابی شاعری
بُھلیا ای نہیں گلی چوں لنگھدا
ٹھنڈی واء دا بُلا
کھوہ نوں جاندی راہ تے مِلیا
سجرے چن دا ٹوٹا
شِکر دُپہریں کوٹھے چڑھ کے
کِن مِن لاؤندا بدل
سانجھی کندھ تے نِت کھلو کے
ہسدا پُھل گُلابی
بُھلیا ای نہیں باری دے وچ
سورج بھخدا ہویا
ادھی راتیں پِنڈ دی گُٹھ تے
بلدا بُجھدا دِیوا
نہر دے کنڈھے لگیا ہویا
گُندھے روپ دا میلہ
جِتھے ہے سی اِک اِک رُکھ دی
سجناں ورگی چھاں
اِنج لگدا اے چھڈ آیا واں
اکھاں اوسے تھاں
ارشاد سندھو
No comments:
Post a Comment
Note: only a member of this blog may post a comment.