جدید پنجابی سرائیکی شاعری
خاک کوں زندگی سمجھ گھندن
خاک ساریں دا ایہو مسئلہ ہے
اساں ساریں دا حق مریندا پئے
اساں ساریں دا ایہو مسئلہ ہے
چھوٹے وستیں کوں اے نگل ویندن
وڈے شارھیں دا ایہو مسئلہ ہے
او مزاحمت دے سونہے نی تھیندے
مونجھ ماریں دا ایہو مسئلہ ہے
من پسندی دا دارو منگدے ہن
کئی بیماریں دا ایہو مسئلہ ہے
رہ ویندے ہن ہمیشہ گردش وچ
سب ستاریں دا ایہو مسئلہ ہے
زور اوندے دی پٹھ بھریندیاں ہن
ساڈیں زاریں دا ایہو مسئلہ ہے
ہار منن کوں کئی وی راضی نی
جیت، ہاریں دا ایہو مسئلہ ہے
اکھیں پتھر دیاں تھی تے رہ ویندن
انتظاریں دا ایہو مسئلہ ہے
میکوں آصف روا تے خوش تھیندن
میڈے یاریں دا ایہو مسئلہ ہے
جاوید آصف
No comments:
Post a Comment
Note: only a member of this blog may post a comment.