جدید پنجابی شاعری
موت دا پندھ
ہوٹھیں تروپے چُپ دے
قدم پندھ اُلیکدے
تھر تھر کنبے دھرتی
چن دا منہ دھوانکھیا
رات وہم خیال دی
بن بن بھوت ڈراؤنے
کلھیوں مینوں ڈراؤندی
جُثیوں خون سُکاؤندی
ننگیاں پیریں جئیون دے
چھالے لہو چواوندے
سہکدے سُولاں تسیاں
پہرے داراں جاگدیاں
آب حیات پلاؤندے
جیون دی دِھیر بنہاؤندے
ثابت راہ فنا تے
وانگوں شوہ دریاں دے
ویہندے وگدے جاؤندے
ٹھلیوں نئیں ٹھلاؤندے
جاڑ مجاڑاں بیلیاں
نھیر منھیرے سمّیاں
واج کوئی الاؤندی
چُپ دے ساج وجائی کے
موت دے راگ سناؤندی
ہوش مِرے گماؤندی
مینتھوں میرے حصے دا
جیون کھوہ لے جاؤندی
اگے سال تے صدیاں
اکھاں دونویں مِچّیاں
ہوٹھیں تروپے چُپ دے
قدم پندھ اُلیکدے
عابد جعفری
اللہ داد خان
No comments:
Post a Comment
Note: only a member of this blog may post a comment.