جدید پنجابی سرائیکی شاعری
فجر دے ویلے در کھڑکا ہے
میں جاں بُوھا کھول کے ڈٹھائے
میڈی دید فقیر تے پئی اے
اوں وت میکوں ڈیکھ کے آکھائے
رب دے ناں تے روئی ڈے چا
میں وی رات دا بچا کچا سالن روٹی چا ڈتا ہے
کاسے دے وچ پا ڈتا ہے
تھوڑی جھئی بس دیر ہے گزری
میڈا ہک مہمان آیا ہے
زمیدار تے خان آیا ہے
اوندے کیتے میں تاں گھر وچ دسترخوان لوا ڈتا ہے
قسم قسم دے کھانڑاں نال او دسترخوان سجا ڈتا ہے
پچھے میکوں ہوش آیا ہے
میں سوچا ہے میں کیا کیتائے
جیڑھا میکوں روزی ڈیندائے
ماء دے پیٹ اچ رزق پُچیندائے
اوندے ناں تے کیا ڈتا ہے؟
بچا کچا چا ڈتا ہے؟
او انسان توں گھٹ سمجھا ہے
رب کوں خان توں گھٹ سمجھا ہے؟
مضطر کاظمی
No comments:
Post a Comment
Note: only a member of this blog may post a comment.