جدید پنجابی سرائیکی شاعری
آدم تھی کے بندیں کوں خدا ڈیندا ریہا ہاں
میں آپ کوں خود آپ دغا ڈیندا ریہا ہاں
دریا دے کنارے تیں تماشائی بنڑیے ہوئے
یعقوبؑ دے پتریں کوں صدا ڈیندا ریہا ہاں
نسلیں کوں میں آداب تمدن دے سکھا کے
نسلیں کوں میں تہذیب ولا ڈیندا ریہا ہاں
جئیں پانڑی منگیے او کوں لہو پیش کیتا ہم
ہر یار کوں ہر حال وفا ڈیندا ریہا ہاں
طعنیں دے میں ہر تیر دا آدر وی کیتا ہے
پتھر جو لگن ول وی دعا ڈیندا ریہا ہاں
اے مونجھ کہیں گھر دا پتہ پچھدی ودی ہئی
میں اپنڑے اوکوں گھر دا پتا ڈیندا ریہا ہاں
میں شعر لکھیے لفظ بنڑیے لاٹ دے وانگوں
ایں رات کوں میں چندر ولا ڈیندا ریہا ہاں
اندھیں کوں شرر دان کیتے اکھیں دا میں سوجھل
گنگیں کوں وی میں اپنڑاں الا ڈیندا ریہا ہاں
شبیر شرر
No comments:
Post a Comment
Note: only a member of this blog may post a comment.