پنجابی ہندکو شاعری
ہندکو لکھ تے ہندکو بول
قائم رکھ اپڑاں ماحول
کد تک رہسیں ڈانواں ڈول
کن کر چاک تے اکھیاں کھول
ہوندی اے پئی اج تیری کرول
ہندکو لکھ تے ہندکو بول
ہور نہ کر بس ٹال مٹول
کجھ اپڑیں بی کر پرچول
جو ہے وی رکھ اووئ ڈول
نہ مل والاں تے سمسول
لہا سٹ سارے چہوٹھے خول
ہندکو لکھ تے ہندکو بول
دنیا گرم تو ٹھنڈا ٹھار
ٹھنڈ تیری مجلس وچکار
ٹھنڈا تیرا ہویا بازار
ہور نہ پی بس اسپغول
ہندکو لکھ تے ہندکو بول
ہک راہتی جاگے ہک سووے
ہک پیا ہسے ہک پیا رو وے
ہک خوش خلق تے پک بدخو وے
پک دیاں گلہاں اچ پہکھ نل ٹووے
ہک دیاں کلہاں دے وچ چول
ہندکو لکھ تے ہندکو بول
حوصلہ رکھ ہمت نہ ہار
اللہ کرسی بیڑے پار
آپ سی آپ نہ ہو بیزار
بچے آں اچ بے شک اردو مار
جان مگر ہندکو تے ڈول
ہندکو لکھ تے ہندکو بول
مٹھے لوک تے مٹھی جیب
خوب اس دے شاعر تے ادیب
ہندکو کلچر تے تہذیب
سٹھ صدیاں دے ہے وے قریب
قد اس دا راقم دے بقول
ہندکو لکھ تے ہندکو بول
ساجد سرحدی
No comments:
Post a Comment
Note: only a member of this blog may post a comment.