جدید پنجابی سرائیکی شاعری
قیدو دے کردار تے کھلنڑ نئیں بنڑدا
غربت دے پرچار تے کھلنڑ نئیں بنڑدا
ہینڑے ہوون یار تے کھلنڑ نئیں بنڑدا
گھر دی حالت ڈیکھ کے روونڑ بنڑدا ہے
ڈھا پووے دیوار تے کھلنڑ نئیں بنڑدا
اٹیاں دے مُل وکنڑ آلے لبھدے نئیں
اُجڑے ہوئے بازار تے کھلنڑ نئیں بنڑدا
مردیاں تونڑیں گھٹ ودھ تھیندیاں راہندیاں ہِن
ساہواں دی رفتار تے کھلنڑ نئیں بنڑدا
جے تُوں مندائیں قیدی تخت لاہور دے ہاں
وت عاشق بُزدار تے کھلنڑ نئیں بنڑدا
پیار پریت دے رشتے کچے ہوون تاں
قیدو دے کردار تے کھلنڑ نئیں بنڑدا
تیڈے ہتھاں دیوچ اگلی طاقت نئیں
نیزہ تے تلوار تے کھلنڑ نئیں بنڑدا
ممکن ہے جو ناں دے وچ وی ہاں ہووے
چن کیندے انکار تے کھلنڑ نئیں بنڑدا
یار نسیما! پاس رکھیں توں پردے دا
کئیں وی پردہ دار تے کھلنڑ نئیں بنڑدا
نسیم بخاری
No comments:
Post a Comment
Note: only a member of this blog may post a comment.