جدید پنجابی سرائیکی شاعری
ونج ہاں قاصد پچھ آ باہنی کیویں وقت گزارے
ایں تاں نہ ہن تیڈیاں ساڈیاں قسماں حداں کارے
ونج ہاں پچھ آ بھاگ بھریے توں کیوں چا دود پھلائے نی
ڈیس کوں سٹ پردیس دیوچ ڈس کیوں چا دیرے لائے نی
کل جئیں جئیں تیں کھلدے ہاسے اج او سب کھلوائے نی
پریتم پیارا کیوں چا سارے قول اقرار بھلائے نی
میں تاں گھولیم چائی وے ڈھولا پیار کوں دانگ لوائے نی
جھوک اجڑی توں جیڑھا لنگھدے کھلدے مار ٹھکارے
پچھ آ مست بہاریں میکوں کیوں آ کیں سدھریندین
کیوں باغیں وچ چس نئیں آندی کیوں خوشیاں ڈکھ ڈیندین
کیوں اے کوئلیں کوک کیں میکوں آپ وانگوں ککویندین
باکروال بدل جاں اٹھدے کیوں اکھیاں رو ڈیندین
کیوں اے چاندڑیاں راتیں میکوں رات یکی جگویندین
ڈنہہ تھی پوندے اجڑ گئی کوں گنڑدیں گنڑدیں تارے
پچھ آ ڈکھ جو ڈہ گن آکیں سر نہ چاوے کے تائیں
منہ تیں چپ دے جندرے لا گئیں نہ الواوے کے تائیں
ملک الموت کرے آ ویلاں ساہ بچواوے کے تائیں
قاصد کے تائیں آندا رہوے خط بھجواوے کے تائیں
کے تائیں کھریاں چاچا ڈیکھے جھاتیاں پاوے کے تائیں
دردیں ماری کے تائیں ڈھولا بیٹھی کانگ اڈارے
اے تائیں بھنڑے ہانی ڈھولا درد بھنی دے بھولے
ہنڑ تاں ٹھڈیاں وائیں بیلے دیاں بنڑ گئین تتے جھولے
بیٹ یکے کوں بھاہ لگ گئی ہے بھانڑے ڈسدن کھولے
دھونہیں دھوڑ ہنباہ تیں کیریاں کاہیں تھین کنولے
مٹیاں تھین اوپٹھیاں یکیاں سنج ڈوہاوے ڈولے
منجھیں جنگلیں رینگدیاں مر گئن رل گئن پھل لیارے
یاد ء تیڈا قول کریندیں قسماں کھاونڑ یاد ء
ہر کہیں توں تھی کلہیں کھیڈنڑ واہ تے دھاونڑ یاد ء
ریت تیں بہہ کیں گھر بنڑاونڑ ول ونجاونڑ یاد ء
کھلنڑ ہسنڑ ٹوک مزاقاں رس رساونڑ یاد ء
ویندی واری ولنڑ دا اتبار ڈواونڑ یاد ء
میکوں تاں سب یاد ء نصرت تیکوں تھین وسارے
اقبال نصرت تونسوی
No comments:
Post a Comment
Note: only a member of this blog may post a comment.