جدید پنجابی سرائیکی شاعری
کل تس ءچ مردے پئے ہاسے آج نک تک پانڑی بوڑی پئے
ہک مینہہ نئیں چاونڑ سر ڈیندا بیا نائیں دا پانڑی لوڑھی پئے
تریجھا ظالم حاکم سر تے ہے جیرھا پل پل خون نچوڑی پئے
بے انت گناہیں کوں ڈیکھ کرائیں رب قہر دے ابھر تروڑی پئے
ہر پاسے موت دا منظر ہے ایڈو چھل آئی اے اوڈو نائیں آئی اے
ہر کہیں کوں اپنڑی پئی ہوئی اے ہر شخص دے منہ تے میں آئی اے
جتھ واچھڑ ہے اوچھنڑ کائنی، جتھاں چٹکا ہے اتھاں چھاں کائنی
امداد دے دعوے دار تاں ہن، امداد دا نام نشاں کائنی
میکوں لگدے حاکم اندھے ہن یا پتھر دل ہن ہاں کائنی
میڈا مالک بس کجھ رحمت کر میڈے لب تے بئی کوئی دھاں کائنی
حاکم کوں فکر ہی کرسی دی بھاویں ملخ سیلاب ءچ لُڑھدا پئے
ہر پاسے چیکاں باکاں ہن، ہر شخص عذاب ءچ چُڑھدا پئے
ڈیرے توں گھن شاہوالی تک ہر شہر سیلاب دی زد ءچ ہے
کئی وسدیاں جھوکاں اُجڑ گئیاں کئی بیٹ گرداب دی زد ءچ ہے
جیرھا کل تائیں کھلدا ملدا ھا، اج حال خراب دی زد ءچ ہے
میڈا مالک آپ کوں پارت ہئی میڈا ملک عذاب دی زد وچ ہے
ودیاں لاشاں لڑھدین پانی وچ، کہیں لاش دا لبھدا سائیں کائنی
اے ملک گناہیں دے گھانڑ اچ ہے تہوں چین سکون کتھائیں کائنی
جیندے نینگر پتر کوں نائیں چا گئی اوندا مال تے بھانڑے کیہں کم دے؟
جیندا بیٹ سیلاب ءچ بڈ گیا ہے بد سیت مہانڑے کیہں کم دے؟
جڈاں سر دے سئیں وی نئیں رہ گئے سر ہیٹھ سرہانڑے کیہں کم دے؟
جیرھے بڈدا ڈیکھ تے لنگھ نئیں آئے سردار پرانڑے کیہں کم دے؟
اے وقت ہے صاحب توبہ دا، کجھ سوچ خدا کیا آہدا پئے
ڈے شانداں روز قیامت دیاں تیکوں وقت ولا کیا اہدا پئے
صاحب لغاری
No comments:
Post a Comment
Note: only a member of this blog may post a comment.