جدید پنجابی شاعری
مائے نی
مائے نی
سانوں نظماں چیتے آئیاں
نظماں جہڑیاں آپے جمیاں
جا ہتھیں دفنائیاں
مائے نی
سانوں نظماں چیتے آئیاں
نظماں جہڑیاں ہڑھ چہ رُڑھیاں
پاون حال دُہائیاں
مائے نی
سانوں نظماں چیتے آئیاں
نظماں جہڑیاں بُھکھ دے ہتھوں
ہٹی وِکنے پائیاں
مائے نی
سانوں نظماں چیتے آئیاں
نظماں جہڑیاں سوکے مَریاں
ساون وِچ ترہائیاں
مائے نی
سانوں نظماں چیتے آئیاں
نظماں جہڑیاں چُکیاں گئیاں
فیر پرت نہ آئیاں
مائے نی
سانوں نظماں چیتے آئیاں
نظماں جہڑیاں ہر اک شئے وِچ
روح دے وانگ سمائیاں
مائے نی
سانوں نظماں چیتے آئیاں
نظماں جہڑیاں اندروں پُھٹیاں
کُل عالم تے چھائیاں
مائے نی
سانوں نظماں چیتے آئیاں
نظماں جہڑیاں دکھاں وانگر
لُوں لُوں وچ سمائیاں
مائے نی
سانوں نظماں چیتے آئیاں
عروہ بن سہیل
No comments:
Post a Comment
Note: only a member of this blog may post a comment.