جدید پنجابی سرائیکی شاعری
دل نال روح دی جھونپڑی وی جلی اے
مونجھ دیں وڑاٹھیں دی بھاہ ڈاڈھی بلی اے
سونے رنگا دل میڈا مٹھ وچ پا کیں
کھل کھل اہدا ہا کیندی کیشے گلی اے
چن دا توں ٹکڑا نہ آکھ میڈے یار کوں
چن تاں او آپ اے چن اوندی ڈلی اے
اج وت ہنج دے دریا کوں چاڑا ہے
وت کوئی دردیں دی نائیں نویں رلی اے
رات میڈی دھاں دی گاج ایجھیں گجی ہے
نیلے اسمان دی نیلی ماڑی ہلی اے
عشقا وے عشقا کیجھیں تیڈی ونڈ ہے
جھل بئے بھر گئے جھولی بنہیں جھلی اے
میں لکھیے خط اوندو اوندی بے وفائی دا
اوں لکھیے چکراں ہوا ایجھیں چلی اے
کھل وی اوں رات اوندے نال نال گئی ہئی
اوندی جو سہیلی ہئی اوندے رلے ولی اے
اکھیں وچ خوابیں دے کیجھے سوہنڑیں گھر ہن
کیجھا سوہنڑاں شاہر اے گلی وچ گلی اے
سجھ ناشاد کوئی سوکھیں تاں نئیں ابھریا
ڈیوے کولوں پچھ ڈیکھو رات کیویں ڈھلی اے
جمشید ناشاد
No comments:
Post a Comment
Note: only a member of this blog may post a comment.