جدید پنجابی شاعری
عُمراں بھر دے پیار سیاست کھا گئی اے
ساڈے سجن یار سیاست کھا گئی اے
ہُن تے من جا تینوں وی تے مینوں وی
رل کے وار و وار سیاست کھا گئی اے
رب دی قسمے کاواں دی تے گِرجھاں دی
ہنساں دے کئی ڈار سیاست کھا گئی اے
کئی کدوں دے روندے پئے نیں جُمعیاں نوں
کئیاں دے اِتوار سیاست کھا گئی اے
ہنُ فر خورے کِنے چُھلیاں بُجھنا اے
پہلاں وی کئی گھار سیاست کھا گئی اے
انھے مورے لوکیں کس دن سمجھن گے
سبھ کُجھ بندے مار سیاست کھا گئی اے
کِتھوں لبھئیے ہاسے، سُکھ تے خُوشیاں نوں
سبھ کُجھ تے سرکار سیاست کھا گئی اے
دس اے سندھوا کِنوں کِنوں روویں گا
ایتھے کئی کِردار سیاست کھا گئی اے
ارشاد سندھو
No comments:
Post a Comment
Note: only a member of this blog may post a comment.