جدید پنجابی شاعری
دل دی پِیڑ دا کس نوں دسدے
دسن دا وی حال نہیں سی
اوس ویلے میں کلا ای ساں
اوس ویلے کوئی نال نہیں سی
سوچن والے دے لئی ایہہ جگ
کِناں چھوٹا ہو جاندا اے
اکو گل تے کٹھا ہو کے
سامنے آن کھلو جاندا اے
سوچ توں چھوٹے ایس جہاں توں
بچنے نوں کوئی ڈھال نہیں سی
اوس ویلے میں کلا ای ساں
اوس ویلے کوئی نال نہیں سی
دُکھاں دی ای سانجھ رہی اے
عمر دے لمے پیندے دے وِچ
خوشی کدی وی رہ نہ سکی
میرے اپنے کینڈے دے وِچ
جنہوں خُشی ءچ وِدیا کردا
ایسا کوئی سال نہیں سی
اوس ویلے میں کلا ای ساں
اوس ایلے کوئی نال نہیں سی
غم وچ ہساں فیر وی آکھن
تینوں روون دا ول نہ آوے
جے اکھ ہنجو نظر کراں تے
جگ نوں ایس توں کون بچاوے
ایسے کارن دُکھ وچ بھجی
اکھ دے ءچ ملال نہیں سی
اوس ویلے میں کلا ای ساں
اوس ویلے کوئی نال نہیں سی
خاقان حیدر غازی
No comments:
Post a Comment
Note: only a member of this blog may post a comment.