جدید پنجابی شاعری
نِکے نِکے ہتھاں دے جد نال دیہاڑی کردے
وارا نہیںوں کھاندے بیبا بال دیہاڑی کردے
توں کیہ جانے تیرے کالے بودے دے لئی پُترا
کِناں عرصہ رہے نیں چِٹے وال دیہاڑی کردے
کنڈیاں دے گھر کرنی پئے گئی پُھلاں نوں مزدوری
پتھراں دے گھر ویکھے نیں میں لعل دیہاڑی کردے
اَیوں تے نہیں فِر جا کِدھرے ہوندا اے کوئی مصرعا
کِنا چِر نیں رہندے سوچ خیال دیہاڑی کردے
ساڈے لئی تے اوہ دِن سندھو آ کے وی نہ آیا
جہڑے دِن لئی رہے ساں کِنے سال دیہاڑی کردے
ارشاد سندھو
No comments:
Post a Comment
Note: only a member of this blog may post a comment.