جدید پنجابی شاعری
اج وی زخم جدائی والا ہریا ہریا جاپے
دل وی اوہدیاں یاداں دے نل بھریا بھریا جاپے
نیویں پا کے بیٹھ رہیا اے مونہوں کج نہ بولے
اج خورے اوہ کیہڑی گلے لڑیا لڑیا جاپے
سڑک کنارے بکل مار کھلوتا سی اوہ بندہ
خورے کون وچارا سی کج ڈریا ڈریا جاپے
نکھریاں ہوئیاں اکھیاں نالے پِجیاں ہوئیاں پلکاں
اوہدی یاد ءچ اج وی بدّل ورہیا ورہیا جاپے
جنا چِر تک سحر اوہ میرے دل دی گل نئی بُجدا
اونے چِر تک اپنا آپ تے مریا مریا جاپے
رضوانہ سحر ہاشمی
No comments:
Post a Comment
Note: only a member of this blog may post a comment.