جدید پنجابی مزاحیہ شاعری
گوبھی
پورا ہفتہ گئی اے گوبھی
ہائے ہائے کاہنوں لئی اے گوبھی
میں تے میتھی لین گیا ساں
اگوں مینوں پئی اے گوبھی
کل دی آلو دے نال لڑ کے
کوٹ کپورے گئی اے گوبھی
پیٹھے پیچھے لُک کے سب نُوں
اکھاں مارن ڈئی اے گوبھی
گونگلواں دے پوگھ تے آ کے
بُک بُک روندی رئی اے گوبھی
ہر بندے نوں بادی کر کے
معافی منگدی پئی اے گوبھی
ایتھے ای اے مُک نہیں جانی
اگّے وی کجھ پئی اے گوبھی
پالک دے صوفے تے بہہ کے
گانے گاندی پئی اے گوبھی
گوبھی سانوں شہروں کڈیا
فیر وی دل وچ رئی اے گوبھی
ادرک، لہسن، مرچاں دے وچ
ماراں کھاندی پئی اے گوبھی
ساوے کُنڈھ چے گورا مُکھڑا
بالکل تیرے جئی اے گوبھی
مِسٹر لَو ایپل توں اج وی
انگلش سکھدی پئی اے گوبھی
ریہڑی اُتوں ڈِگ کے سب نُوں
گالھاں کڈھدی پئی اے گوبھی
کل وی پکّی، اج فیر پکّی
لگدا ساڈے لئی اے گوبھی
ٹِڈھ چ بائیو گیس بنا کے
بنّے نِکلن ڈئی اے گوبھی
بالاں چکھّی، میں وی کھادی
بیگم تک وی گئی اے گوبھی
ہائے ہائے کاہنوں لئی اے گوبھی
پورا ہفتہ گئی اے گوبھی
ماسٹر الطاف حسین
No comments:
Post a Comment
Note: only a member of this blog may post a comment.