جدید پنجابی شاعری
سر توں مرچاں وار کے ساڑن والی ٹُر گئی میری ماں
مینوں لگی نظر اتارن والی ٹر گئی میری ماں
مینوں سُکی تھاں تے کر کے آپی گِلی تھاں اُتے
جاگ کے ساری رات گزاران والی ٹر گئی میری ماں
نِکیاں ہندیاں میری نِکی جئی تکلیف تے سارا دن
رو رو اپنا آپ وسارن والی ٹر گئی میری ماں
راتاں نُوں اُٹھ اُٹھ کے پنجتن پاک تے اپنے خالق نُوں
میری خاطر روز پکارن والی ٹر گئی میری ماں
کیہہ کرنا تے کیہہ نئیں کرنا ہُن مینوں سمجھاوے کون
سچ تے جُھوٹ نُوں خوب نتارن والی ٹر گئی میری ماں
جیون ویہڑے ہُن جے ڈِگیا فیر نہ شاید اُٹھاں گا
ڈِگیاں میرا بھار سہارن والی ٹر گئی میری ماں
میرا سر تے متھا چُم کے نال دُعاواں دے تسنیم
مینوں ہر میدان کھلارن والی ٹر گئی میری ماں
تسنیم عباس قریشی
No comments:
Post a Comment
Note: only a member of this blog may post a comment.