جدید پنجابی شاعری
ویری نال وپار نہ کرئیے؟
جپھی پا کے پیار نہ کرئیے؟
بندہ مگروں لہہ جاندا اے
سِر تے یار سوار نہ کرئیے
ماندری مردے واری آکھا
سپّاں تے اتبار نہ کرئیے
سودا نقد و نقدی چنگا
سجڑاں نال ادھار نہ کرئیے
کڑمے نوں کوئی کم نہ کہئیے
کوڑے نوں سردار نہ کرئیے
کم اچ کچا ہتھ نہ پائیے
نئیں ہوندا سرکار! نہ کرئیے
بُکل دے وِچ چور لُکائیے
پار نوں وی اروار نہ کرئیے؟
بھاویں کوئی رُسدا رُس جائے
کُوڑے قول قرار نہ کرئیے
قسم خُدا دی مر جاندا اے
کئیں دا بھرم شکار نہ کرئیے
یار جے کَھل دا کُھسہ منگے
قطعاً وی انکار نہ کرئیے
"سوچی پیا، بندہ گیا""
بوہتی سوچ وچار نہ کرئیے
یار علیما! تُوں کی کہندا ایں
میں تے کہنداں پیار نہ کرئیے
علیم ملک
No comments:
Post a Comment
Note: only a member of this blog may post a comment.