گیت
سانوں یار دے دوارے بیٹھے رہین دے
جیویں مندا اے یار نوں منا لین دے
چولا عشق دا اسیں پاء بیٹھے
لگ قدمی مرشد دے سر نوں جھکا بیٹھے
گلاں دلدیاں دلبر ماہی نوں کہن دے
سانوں یار دے دوارے بیٹھے رہین دے
شرح شرح نہ کر ملاں شرح عشق دا بھید سارا
عشق راز شرح دے کھول چھڈ دا عشق راز نیارا
سٹ عشق شرح دی سر سہن دے
سانوں یار دے دوارے بیٹھے رہین دے
بھید عشق دے کوئی ورلا جانے
لبھدے نئیوں چھیتی وید سیانے
گل وچ الفی عشق دی پین دے
سانوں یار دے دوارے بیٹھے رہین دے
مکھ دلبر دا ویکھنا حج اے ساڈا
دید نظارہ اکھیاں پھج اے ساڈا
گھنڈ میم والا الف توں چان دے
سانوں یار دے دوارے بیٹھے رہین دے
یار یار جپنا تے یار یار کہنا اے
یار باجھوں ساہ وی نہ لینا اے
صورت یار دی اکبر دل چہ سمان دے
سانوں یار دے دوارے بیٹھے رہین دے
اکبر چشتی
No comments:
Post a Comment
Note: only a member of this blog may post a comment.