گیت
مڑ اج یاد کسے دی آئی
آئی یاد کسے دی
لوں لوں دے وچ دھائی
یاد کسے دی
آئی یاد کسے دی
یاد کسے دی راس دلے دی
ایسے راسوں وٹک ہوئی سی لٹک کسے دی
ایسے لٹکوں مڑ اج تر گئی
ڈبی ہوئی راس کسے دی
راس کسے دی
آئی یاد کسے دی
وچھڑے سجن یاد جاں آون
اکھاں وچ اتھرو پھیرے لاون
ہر اتھرو دے شیش محل وچ
دسن آساں ڈکیاں ہوئیاں
قیداں کٹ کٹ تھکیاں ہوئیاں
ادریویں پئے ترلے لیندے
کاہلاں کردے سوڑے پیندے
ایہناں کاہلاں سوڑاں ہتھوں
اکھ جھمکن وچ
شیش محل پئے ڈھیندے
سجیاں اکھاں
سجیاں پلکاں
پلکاں دے وچ رتّ دیاں ڈلھکاں
بلدے ہاوے
ٹھنڈے ہوکے
اک مک ہندے ہاڑھ تے ساون
وچھڑے سجن یاد جاں آون
مڑ اج یاد کسے دی آئی
آئی یاد کسے دی
لوں لوں دے وچ دھائی
یاد کسے دی
آئی یاد کسے دی
شریف کنجاہی
No comments:
Post a Comment
Note: only a member of this blog may post a comment.