جدید پنجابی شاعری
پھٹ ہجر دا کاری اے
رونا وارو واری اے
جیون کھیڈ تماشے وچ
بندہ وانگ مداری اے
دل پنچھی دی سجنا وے
تیرے ہتھ اڈاری اے
رب نے چن تے تاریاں نال
کیویں رات شنگاری اے
مونہوں شعر نہ بولے تے
جھوٹی سب فنکاری اے
دل دے گھپ ہنیرے وچ
نہ بوہا نہ باری اے
گالھڑ بن پٹواری گئے
کاواں ہتھ سرداری اے
دنیا دے اس جنگل وچ
ہر انسان شکاری اے
ساہ دا کج اتبار نیئں
کاہدی دعویداری اے
جیہڑا لاگے بہندا سی
ویکھن تو انکاری اے
میں وی پیار چہ جھلی آں
تیری مت وی ماری اے
جے نہ مینوں رنگے تے
کاہدا عشق للاری اے
عنبر دنیا جت لیندی
دل دے ہتھوں ہاری اے
فرحانہ عنبر
No comments:
Post a Comment
Note: only a member of this blog may post a comment.