جدید پنجابی شاعری
اینی چنگی نئیں مغروری بابا جی
لنگھ جاندے او پا کے گُھوری بابا جی
ویکھن نوں تے گھر دی کندھ وی سانجھی اے
پر دِلاں وچ کیوں اے دُوری بابا جی
رنگ نئیں لبھا جہڑا پھبدا ایہدے تے
رہ گئی اے تصویر ادھوری بابا جی
لوکاں وچ میں کھنڈ پتاسے ونڈاں گا
دل دی آس جے ہووے پُوری بابا جی
جگ تے جے نہ کُھلدے بھید پریتاں دے
فر تے رل مِل کھاندے چُوری بابا جی
کوئی صورت تے کَڈو، مُکھ وکھاون دی
ایہڈی وی ہن کیہ مجبوری بابا جی
رب دیوے شہزاد تے پُوری پیندی اے
اُنج کدے نئیں پیندی پُوری بابا جی
شہزاد مغل عجمی
No comments:
Post a Comment
Note: only a member of this blog may post a comment.