جدید پنجابی شاعری
ہویا یتیم کل جہاں مولا علیؑ دے بعد
ہوئی حیات رائیگاں مولا علیؑ دے بعد
کندھاں تے بُوہے روئے نے مسجد دے زاروزار
کُوفہ اے سارا نوحہ خواں مولا علیؑ دے بعد
پہلاں حسنؑ نوں زہر دتا فیر لاش تے
مارے نے تیر امتیاں مولا علیؑ دے بعد
آلِؑ رسول پاکﷺ نوں امت نے رولیا
ہر گام تے مصیبتاں مولا علیؑ دے بعد
اک کربلا بپا ہوئی کنبہ ای مر گیا
خیمے وی سن دھواں دھواں مولا علیؑ دے بعد
بیمار اک ضعیف تے کرب و بلا دی ریت
کجھ بے ردا سی بیبیاں مولا علیؑ دے بعد
عطرت رسولِ پاکؐ دی سفراں چ رل گئی
رسیاں کتے نے بیڑیاں مولا علیؑ دے بعد
تسنیم ساڈے رون لئی دربار شام دا
ہن بیٹیاں علیؑ دیاں مولا علیؑ دے بعد
تسنیم عباس قریشی
No comments:
Post a Comment
Note: only a member of this blog may post a comment.