جدید پنجابی شاعری
مُورکھ سانگے ڈلدے ویکھے
وہم دلاں دے پلدے ویکھے
سچ دا مُل کسے نہ پایا
جُھوٹھ دے چکر چلدے ویکھے
سو سو قسماں چُکن والے
لوڑ پئی تاں ٹلدے ویکھے
گرگٹ وانگوں لوکی ایتھے
پل پل رنگ بدلدے ویکھے
بندیاں نوں اج بندے یارو
گلاں دے نال چھلدے ویکھے
در کھڑکاوے پئی تبدیلی
لوکی اس توں ملدے ویکھے
خاور! لارے لاون والے
فیر کدی نہ ولدے ویکھے
عبدالستار خاور
No comments:
Post a Comment
Note: only a member of this blog may post a comment.