پنجابی سرائیکی شاعری
شالا کرے نہ پیار کوئی
ہک ڈینہہ ڈکھی تن چور ہا
دل غم کنوں مغمور ہا
ہنجھواں دا ہا پل پل سفر
بیتاب ہئی قلب و نظر
دنیا کولوں اکتا کرائیں
تنہائی کوں گل لا کرائیں
عقلوں سبھو کجھ لہہ گیا
خاموش تھی میں بہہ گیا
تیلی میں چٹخا ڈتی
شمع دےسربھالا ڈتی
شمع بلی بلدی رہی
بہوں دیر تائیں جلدی رہی
شمع ولو پا کے ضیاء
پروانہ ول ہک آ گیا
آکے تھیا بہوں بے صبر
مارنڑ لگا شودا چکر
بہوں دیر تائیں گھمدا ریہا
شمع دی لو چمدا ریہا
ہک وقت ایجھاں آ گیا
پاگل تھیا برما گیا
بے ساختہ منہ توں ولا
اوندے ایہا نکھتی صدا
بھل کے کہیں دے نال وی
شالا کرے نہ پیار کوئی
گل پئ کوں پا ٹھمکا کرائیں
زندگی کنوں مکلا کرائیں
غم عشق وچ مدغم تھیا
اڈریا تے بھاہ وچ گھم تھیا
تن من سڑیا سڑ گیا جگر
پل وچ گیا پروانہ مر
اے ڈیکھ کے سب کجھ ولا
شمع کوں میں آکھن لگا
اتنا تاں اج میکوں ڈسا
ہیں کوں آکھیندے ہن وفا
جیویں تاں اج کر کے ڈکھائی
اینویں تیکوں ٹھاندی نہ ہائی
تن گرم تے من سرد ہیں
بادرد نئیں بے درد ہیں
سنڑ کے ساڈیاں گالھیں ولا
پروانے بولی سوا
اڈری تے کھنڈگئی جاہ بجا
آونڑ لگی ہر سو صدا
بھل کے کہیں دے نال وی
شالا کرے نہ پیار کوئی
پروانے دی سن کے صدا
شمع تے لرزھ چھا گیا
بے وس شودی رونڑ لگی
ہنجواں توں منہ دھونڑ لگی
آکھے توں دل کو صاف کر
عاشق ہیں تاں انصاف کر
سن دھاڑ دل دیوانے دی
عاشق ہاں میں پروانے دی
گل پا کے پھاہی پیار دی
طالب بنڑیم دیدار دی
سر عشق کھارے چا کرائیں
خود آپ کوں بھاہ لا کرائیں
جلاں تے دل جالاں کھڑی
رستے ایندے بھالاں کھڑی
اے آیا تے آکے جل گیا
الٹا کیتی بے کل گیا
نہ سر بدھی کئی پیار دی
نہ تس بجھی دیدار دی
مونہو نہ کجھ الوا سگی
نہ حال دل سنڑوا سگی
اے آیا تے آکے مر گیا
کم ظرف بازی ہر گیا
افسوس ایں منہ ولا
شکوے کیتے ہے کھل گیا
رونڑ دے وچ ول رجھ گئی
ایہو آکھ شمع بجھ گئی
بھل کے کہیں دے نال وی
شالا کرے نہ پیار کوئی
مشتاق سبقت
No comments:
Post a Comment
Note: only a member of this blog may post a comment.