میڈی جان میکوں کجھ تهی گیا ہے

 پنجابی سرائیکی شاعری

میڈی جان میکوں کجھ تهی گیا ہے

کجھ اکهیں کافر تهی گیاں ہن

کجھ دل وی دین تے نیں رہ گیا

میڈے وس وچ ہا ہک پیر میڈا

اووہو پیر زمین تے نیں رہ گیا

ایویں لگدا ہے

میڈے تن من وچ

میڈی جی سائیں وچ

میڈی ان من وچ

کوئی آپنڑا جیونڑ جی گیا ہے

میڈی جان میکوں کجھ تهی گیا ہے

تیڈے ملنڑ دی سک اوویں سک رہ گئی

تیڈا ہجر جو ڈهیر ابالها ہا

تیڈے شوق دیاں ونگاں چم چاتن

دل کملا ہا

دل گالها ہا

تیڈی ونگ کوں کچ نئیں آکھ سگیا

توڑیں سچ ہا، سچ نئیں آکھ سگیا

کہیں وس دا پیالہ پی گیا ہے

میڈی جان میکوں کجھ تهی گیا ہے

میڈی ڈهلی شام دا ویلها وی

چودهار اندهارا جهم تهی گئے

میکوں آپڑیں کو وی نئیں آندی

میڈے نال پچهاویں گم تهی گئے

اج رات سہاگ دا جاگا ہا

ساہ سوئیاں ہا، دل دهاگا ہا

کوئی سیپ لباں تے سی گیا ہے

میڈی جان میکوں کجھ تهی گیا ہے

عزیز شاہد