جدید پنجابی شاعری
ماں بولی دے ناں
اکھراں دی پہچان ودھاؤ
ماں بولی دی شان ودھاؤ
کیوں پھڑدے او غیر دا پلہ
اپنی پگ دا مان ودھاؤ
لج رکھن جو ماں بولی دی
غیرت مند انسان ودھاؤ
اینہوں گھراں سکولاں دے وچ
بولن دا امکان ودھاؤ
مٹھی بولی بول پنجابی
بلہاں دی مسکان ودھاؤ
رہتل مردہ ہو نہ جائے
آؤ اس دی جان ودھاؤ
بچیاں نال پنجابی بولو
خوشیاں دا سامان ودھاؤ
اپنی بولی بول کے عنبر
اگے پاکستان ودھاؤ
فرحانہ عنبر
No comments:
Post a Comment
Note: only a member of this blog may post a comment.