پنجابی سرائیکی شاعری
کون تھی سگدے سانویں تیڈے
چندر چُمدے پچھانویں تیڈے
ساڈی کنگھی وی شیشہ وی توں
ساڈے شیشے دی تصویر توں
ساڈی دھڑکن تے پہرہ تیڈا
ساڈے پیریں دی زنجیر تُوں
ساڈے گل وچ گلانویں تیڈے
چندر چمدے پچھانویں تیڈے
تیڈے رستے تے جو ٹر پیوں
ساڈے پیریں تے پھل پے گئے
اساں دھرتی دے بے قیمتے
ساکوں خود اپنڑیں مُل پے گئے
تھئے ہیں جئیں ڈینہہ دے نانویں تیڈے
چندر چمدے پچھانویں تیڈے
ساڈا پورہ تے ترکہ وی توں
ساڈے چنتے تے گنڑ منڑ وی توں
کنڈو رانڑیں فقیریں اتے
ترمدے ساونڑ دی کنڑ منڑ وی توں
ساڈے سر تے ننانویں تیڈے
چندر چمدے پچھانویں تیڈے
کیا پتہ ہجر تیڈے اندر
کیں تونڑیں زہر پیندے اساں
تیڈا غم وی نہ ہوندا جیکر
کیا خبر کیویں جیندے اساں
جیندے پئے ہیں پسانویں تیڈے
چندر چمدے پچھانویں تیڈے
ساڈے چوپھیر مجمع وی توں
ساڈے اندر دی تنہائی توں
ساڈی تریہہ دا تماشا وی توں
ساڈا شاہد تماشائی توں
گیڑ سارے ولانویں تیڈے
چندر چمدے پچھانویں تیڈے
عزیز شاہد
No comments:
Post a Comment
Note: only a member of this blog may post a comment.