عالم وچ پیا ہر جاہ اپنا رنگ ڈکھلیندا آپ میاں

 پنجابی سرائیکی شاعری

عالم وچ پیا ہر جاہ اپنا رنگ ڈکھلیندا آپ میاں

دل وچ رہ او حق ہو، حق ہو ذکر کریندا آپ میاں

پھل سرمی دے پیلے سوہنے ہر ہک اکھ کوں بھاندے

ون سونے پکھی ہر جاہ گیت خوشی دے گاندے

دریا دی ہر چھول اندر او شان ڈکھیندا آپ میاں

من وچ بالے عشق دا بھانبن،اپنی پیت جگاوے

آپ اکھیندا یار انالحق کہیں کوں سمجھ نہ آوے

اپناں ہر اِسرار کُھلیندا، دار چڑھیندا آپ میاں

آپ بنایوس نال مٹی دے آپ سڈیندا نائب

آپ ہے ہر جاہ ظاہر سوہنا آپ ہے ہر جاہ غائب

خاکی کوں چا نوری کردا، رنگ بدلیندا آپ میاں

جیڑھا یار دی گول اچ نکھتا سڑیا ہجر دی بھا وچ

واحد یار اکھاوے پر ہے جلوہ ہر ہر جاہ وچ

وحدت والا رازڈسیندا، پردے ڈیندا آپ میاں

شکیل انجم لاشاری