جدید پنجابی شاعری
اکھ دا کوٹھا چون نئیں دیندا
کھل کے مینوں رون نئیں دیندا
اک اک کر کے ڈلھ گئے سارے
ہنجو ہور پرون نئیں دیندا
کیہڑا دکھ اے جیہڑا مینوں
پباں بھار کھلون نئیں دیندا
بہندا نئیں دو گھڑیاں لاگے
درد پرانے چھون نئیں دیندا
پوہ تے پچھلی رات دا ویلا
ہجر دا پالا سون نئیں دیندا
اندر آؤندا وی نئیں دل دے
بوہا وی او ڈھون نئیں دیندا
سر تے چاء کے ہجر دی گھٹڑی
غم دا بالن ڈھون نئیں دیندا
میں جے ضبط کراں وی کدرے
ہنجو درد لکون نئیں دیندا
نہ بنڑدا اے میرا عنبر
اپنا وی او ہون نئیں دیندا
فرحانہ عنبر
No comments:
Post a Comment
Note: only a member of this blog may post a comment.