ظلمی ظلم کریندا ہر ڈینہہ ظلمی ظلم کریندا

 پنجابی سرائیکی شاعری

ظُلمی ظلم کریندا ہر ڈینہہ، ظُلمی ظلم کریندا

دھرتی دے ہر جم پَل کوں ایں آپ غدار ڈکھایا

جو سر نہ تھی سگدا نینواں او سر دار چڑھایا

سچ کوں مار مریندا ہر ڈینہہ، سچ کوں مار مریندا

حق، سچ دی کوئی گالھ وی اینکوں اصلوں ناہیں بھاندی

رَل مِل چور دی ٹبری ہے پئی یار ریاست کھاندی

قاضی فتوے لیندا ہر ڈینہہ، قاضی فتوے لیندا

آپ بنڑیندا بوتے تے وت اینکوں منو آہدا

خلقت دے اَلا کوں سمجھے کنڈا اپنی راہ دا

حاکم چال چلیندا ہر ڈینہہ، اپنی چال چلیندا

کفر ریاست چل سگدی اے، ظلم دی چل نہ سگدی

کوئی ریاست جتنی ڈاڈھی سچ کوں جھل نہ سگدی

یار شکیل ڈسیندا ہر ڈینہہ، یار شکیل ڈسیندا

شکیل انجم لاشاری