جدید پنجابی شاعری
رو رو نیناں دین دہائی سجناں وے
ہائے تیری بے پرواہی سجناں وے
یاد اوہناں نوں دنیا اج وی کردی اے
جنہاں لا کے توڑ نبھائی سجناں وے
دل دے کورے کاغذ اتے ریجاں نال
میں تیری تصویر بنائی سجناں وے
میرا ہو کے وی توں میرا بنڑدا نئیں
اکو تیرے وچ برائی سجناں وے
ہس ہس گلاں کرنا ایں توں غیراں نال
کیہڑی میرے نال لڑائی سجناں وے
توں پردیس نوں چھڈّ تے اپنے گھر آ جا
چلہے پانی ڈھیر کمائی سجناں وے
تیرے پچھے عنبر میں تے کھٹی اے
طعنے مہنے تے رُسوائی سجناں وے
فرحانہ عنبر
No comments:
Post a Comment
Note: only a member of this blog may post a comment.