جدید پنجابی شاعری
مائے نی تیرے مرن توں مگروں
دکھ دے کِکر تَھلے جیہڑی
پھوہڑی وِچھی سی درداں دی
اوتھے جِنے بیٹھے سن ناں
مٹی تھلے دب کے تینوں
اپنے گھراں نوں مڑ گئے سارے
عمروں ودھ سیانے مائے
اسیں تے اوسے پل ہو گئے ساں
اوہی رکھ تے اوہی پھوہڑی
ایسے لئی اسیں چھڈی ناہیں
ہولی ہولی اک اک کر کے
سب نے اپنے روپ وکھائے
لوڑ پین تے ہر رشتے نوں
وارو واری موت وی آئی
ہر سنگت نون کفنی پا کے
اپنے ہتھاں نال دفنائی
مائے تیرے وچھڑن باہجوں
جیہڑا ساتھ رہوے جی صدقے
سانوں رتی فرق نئیں پیندا
جیہڑا جانا چاہوے جائے
محشر دے وچ ہون گے میلے
ہائے نی میریئے سوہنیئے مائے
ماوٰی سلطان
No comments:
Post a Comment
Note: only a member of this blog may post a comment.