جدید پنجابی شاعری
نِت لوڑاں نویاں سنگتاں
میں ہجر ہنڈائیاں رونقاں
میری اکھ چمکار بھرے
مینوں پُنگرے رُت وصال دی
دل وحشت خاک کرے
میں ماکھی اپنی رَت دا
مِرا پِنڈا رسو رس
میری تیہہ نئیں بُھجدی سنگیو
لَکھ سُرکاں اپنی چسّ
مینوں دُدھ پیاؤ اکّ دا
کِتے میرا لوبھ ٹھرے
نِت لوڑاں نویاں سنگتاں
مینوں اکھیاں رکھیا رہن
میں رنگیا کالے رنگ وچ
مینوں ڈب کھڑبا کہن
میں وچ گُناہیں ڈُبیا
میرے اندر زہر تَرے
میں تاواں روز سریر نُوں
رُوح بال کے دِیوے نال
کوئی چَھووے میرے نِگھ نُوں
کوئی آ کے جِیوے نال
کِنھوں درد ہے میری ہوند دا
کیہڑا میری موت مَرے
انجم سلیمی
No comments:
Post a Comment
Note: only a member of this blog may post a comment.