جدید پنجابی شاعری
گل کِسے کیتی سی
خورے کیہڑی گل سی
خورے کِنے کیتی سی
خورے کدوں کیتی سی
خورے کی تریخ سی
خورے کیہڑا وار سی
رب جانے
بدھ سی کہ یا اتوار سی
خورے کیہڑا ویلا سی
شام دا ہنیرا سی
کہ فجری دا نُور سی
کوئی اُگ سُگ نئیں
ٹھنڈ سی کہ نِگھ سی
تُپ سی کہ چھاں سی
شہرسی گراں سی
خورے کیہڑی تھاں سی
خورے کیہڑی رُت سی
امبیاں تے امب سَن
یا اجے بُور سی
چیتے دی پڑولی دیاں
گٹھاں پیا پھولناں
ویلے دیاں لیراں والا
کِیھنوں پیا کھولناں
گل کِسے کِیتی سی
تے گل کیوئیں کیتی سی
جِنے کِنے کیتی سی
اوہ نیٹرے سی کہ دُور سی
گل دا سواد ہُندا
خورے کی سواد سی
پھیکی سی کراری سی
کَھٹی سی کھاری سی
تُمے وانگوں کوڑی سی
کہ یاں موتی چُور سی
گل کوئی ضُرور سی
انور مسعود
No comments:
Post a Comment
Note: only a member of this blog may post a comment.