جدید پنجابی شاعری
اِک پُرانے مِتر دی کال
اَج چِراں پِچھوں اوہدی کال آئی
سِیت سمے دی یُگاں بُجھی
چندری چِننگ وی نال آئی
اوس پُچھیا
دیس دیاں کیہ لوڑاں تھوڑاں
میں دَسیا
جِتھے امباں دے جُھنڈ سَن
اوتھے ہاؤسنگ سوسائٹیاں دے تھم نیں
جِتھے پکھواں دے گھر سِن
اوتھے مویاں دے چم نیں
تے رُکھاں دی تھاں
پلاٹ اُگدے نیں
بی چنبے دا سُٹدے ہاں
بھوگاٹ اُگدے نیں
ڈیلراں دے فوناں تے
آیتاں آلیاں رِنگ ٹوناں وجدیاں نیں
تے راتیں بُرقعہ پا کے نکلن آلیاں بالڑیاں
قصیدہ بردہ شریف لایا ہویا اے
جج سکولاں وچ ناظرہ پئے چیک کردے نیں
جیون دی لاری نال لٹکیا
پُنوں سائیکل آلا
ہتھ چھڈ کے سائیکل چلا رہیا اے
نویوں نویں بہار اے
سَدھراں نوں چڑھیا
واری دا بخار اے
کاواں کبوتراں دا بھیس وٹایا اے
بگلے ہنساں دے چولے وِچ نیں
کوڑ سچ دوویں رولے وِچ نیں
طارق بھٹی
No comments:
Post a Comment
Note: only a member of this blog may post a comment.