جدید پنجابی شاعری
مسیت ویندا جے پئیں تاں ونج کے
خُدا کوں میڈے سلام ڈیویں
خُدا کوں آکھیں
فُلانے گھر دا فُلاناں وارث
تریجھے ڈیں توں وفات پا گئے
فُلانے گھر وچ یتیم راہندن
خُدا کوں آکھیں
او آ کے ڈیکھے
یتیم تھیونڑ دے بعد کیویں
کوئی وی رشتہ نئیں راس آندا
یتیم کیویں نئیں کہیں کوں بھاندا
گُزردی کیویں ہے اوندی جگ تیں
بغیر پیو دے زمانہ کیویں
قدم قدم تے لتاڑی رکھدے
خُدا کوں آکھیں
فُلانے گھر وچ فُلانی بیوہ تے
کلہی عورت دیاں چار دِھیاں
بغیر شادی دے بُڈھڑیاں تھی گئن
کنوارے پن وچ شباب ڈھل گئے
کہیں دے والاں دے وچ سفیدی
کہیں دے چہرے تے جھُریاں ہن
کہیں دے چہرے دا رنگ پِیلا
کہیں دے تھُوڈیں دا رنگ نیلا
خُدا کوں آکھیں
او آ کے ڈیکھے
جہیز سب دِیاں جوانیاں کھا گئے
راشد خان عاشر
No comments:
Post a Comment
Note: only a member of this blog may post a comment.