جدید پنجابی شاعری
باہجے نوں بُھل یاد کرانی پَیندی اے
اوہدی اصل اوقعات وکھانی پیندی اے
کون جگہ دیندا اے اُچّے پدّھر تے
اپنی تھاں وی آپ بنانی پیندی اے
سوگ سُراں وچ دُکھ ورلاپے کون مِرے
سینے تے وی تال وجانی پیندی اے
بہہ جاندی اے ہف کے جھٹ کُو دُھوخ لئی
روز نویں جد موڑ کہانی پیندی اے
جیون دی خود راکھی کردی موت مِری
قاتل گھڑیاں دی جد ڈھانی پیندی اے
حل نئیں چاہندے حاکم، مُنصف، مُفتی وی
پانی دے وچ روز مدھانی پیندی اے
اوہدی سُورج ورگی دکھ نوں ویکھن لئی
مینوں کالی عینک لانی پیندی اے
تھوڑاں اوہ ای جانے جِنہوں ضامن جی
رِیجھ اک ورہیاں تک ورچانی پیندی اے
الطاف ضامن چیمہ
No comments:
Post a Comment
Note: only a member of this blog may post a comment.