عارفانہ کلام
تیری اُچی شان کریما
میں تیرے قربان کریما
تیرے کرماں نال ای وسدے
ایہہ جو کُل جہان کریما
پتھر وچ وی رزق توں دیویں
توں اے رب رحمان کریما
تیری کردے رہن عبادت
قدسی، جن، انسان کریما
جگ تے جو وی نیں بے وارث
سب دا توں نگران کریما
میں اک عاجز بندہ تیرا
مشکل کر آسان کریما
ہر اک شے دا توں ایں مالک
توں سب دا سلطان کریما
تیرا نام لباں تے ہووے
جس دم نکلے جان کریما
بخش دئیں میں جئے عاصی نوں
تیرے تے ہے مان کریما
کر دے فضل قلندری اُتے
ایہہ تیرا ثناخوان کریما
اکرم قلندری
No comments:
Post a Comment
Note: only a member of this blog may post a comment.