جدید پنجابی شاعری
ویکھ انکھاں نوں رول پئے لوکی
نت وجاندے نیں ڈھول پئے لوکی
کوئی نترے وچار کیوں سوچے
گل کردے نیں گول پئے لوکی
نت نویں چاواں نالے خوشیاں لئی
ہون دُکھاں دے کول پئے لوکی
روز ویہناں واں کنے روڑی چوں
رزق لبھدے پھرول پئے لوکی
چنگی رُت وی ضرور آوے گی
جدوں بولن گے تول پئے لوکی
جھُوٹ نوں راہ نہ لبھنی پہجن دی
جے کدی سچ بول پئے لوکی
کیویں بچنا اے جیہڑے پیندے نیں
زہر امرت چ گھول پئے لوکی
روز جیون دے کھوہ دے وچ تسنیم
ساہ دا سٹدے نیں ڈول پئے لوکی
تسنیم عباس قریشی
No comments:
Post a Comment
Note: only a member of this blog may post a comment.