جدید پنجابی شاعری
نہ یس آکھاں نہ نو آکھاں
جو آکھیں تُوں اوہو آکھاں؟
ہُن ایناں وی میں انھّاں نہیں
تیرے صِفرے نوں سو آکھاں
جو تھتّھا کر دے جِیبھاں نوں
میں اکھراں وچ پرو آکھاں
میں تیرے نیلے تھوتھے نوں
دس کِسراں کھنڈ گھیو آکھاں
میں ایس لئی چُپ وٹّی اے
تُوں سُندا نہیں میں جو آکھاں
میں پُھل چوں شہد چُرانا ایں
بُلھیاں دے نیڑے ہو آکھاں
چانن دا ویری فیر ظفر
آکھے نیھرے نوں لَو آکھاں
ظفر اعوان
No comments:
Post a Comment
Note: only a member of this blog may post a comment.