سب نال راضی رہندا میرے نال وَیر اے ایہہ کی قہر اے

  جدید پنجابی شاعری

سب نال راضی رہندا میرے نال وَیر اے، ایہہ کی قہر اے 

دل وچ مینوں لگے تیرےکوئی غیر اے، ایہہ کی قہر اے 

میرے اخلاص نوں توں دل وچوں کڈھ کے ہر گل چھڈ کے

تھلے میرا دل آیا جتھے تیرا پیر اے، ایہہ کی قہر اے 

اک تاں توں کدی میرے دکھاں نئیوں پھولیا اتوں انج رولیا

کھڑی آں میں کلّی تیرے ول سارا شہر اے، ایہہ کی قہر اے

سامنے وی رہ کے میتھوں نظراں چراوے او، دل نوں ستاوے او

میرے ول آوے اِکو دُکھاں والی لہر اے، ایہہ کی قہر اے

جیہدے نال جنماں دی بَدھی اک ڈور سی، جیہدا بڑا شور سی

میرا اوہنوں ناں لگے اج کل غیر اے، ایہہ کی قہر اے

مکدی مکا لے اج مینوں دس کھل کے، تکڑی چ تل کے

تیری گل گل وچ لگے مینوں زہر اے، ایہہ کی قہر اے

طعنے مینے تیرے مینوں تِیراں وانگ لگدے ہنجوں میرے وگدے

سدھراں دی بیڑی ڈبی ہنجواں دی نہر، اے ایہہ کی قہر اے

دِل نوں عروج کِیتا کِنا مجبور اے کیتا چور چور اے

دُکھ میرے سن کے اوہ بولے سب خیر اے، ایہہ کی قہر اے

عروج زیب