جدید پنجابی شاعری
پیلاں پاندا موراں وانگوں آؤندا اے
کٹیاں ہوئیاں ڈوراں وانگوں آؤندا اے
سردی وچ وی تیرے ٹھنڈے ہتھاں دا
مینوں مزہ ٹکوراں وانگوں آؤندا اے
شاعر ادھی رات مشاعرہ پڑھ کے تے
اپنے گھر وی چوراں وانگوں آؤندا اے
اپنا بن کے آوے میری سار لوے
پر سجّن وی ہوراں وانگوں آؤندا اے
میں جے ہس کے ویکھاں او وی ہس پیندا
غصے وچ منہ زوراں وانگوں آؤندا اے
جد کوئی ہرنی ٹُردی ویکھاں جنگل وچ
چسکا تیریاں ٹوراں وانگوں آؤندا اے
اوہدا چن جہیا مُکھڑا ویکھن لئی تنہا
دل بے تاب چکوراں وانگوں آؤندا اے
محمد عمران تنہا
No comments:
Post a Comment
Note: only a member of this blog may post a comment.