جدید پنجابی شاعری
اوس اخیری تکنی اندر، کناں درد سی ہائے
اوہدے وچھڑن والا ویلا، کنج بھلایا جائے
کالخ لپے انبروں لیکے، نیناں تیک ہنیرے
تیرے باجھوں کہڑا میریاں، اکھیاں نوں رشنائے
نہ دیہہ بھیتیا اینے لارے، لمیاں عمراں والے
مر کے اک ہنڈھائی اے ہن، دوجی کون ہنڈھائے
توں وی اپنیاں زلفاں اندر، پھل ٹنگنے بھل گئیؤں
میں وی رنگ برنگے بانے، پھیر کدی نہ پائے
انج ادھواٹیوں ٹٹی یاری، جیونکر گڈی ڈوروں
ہن تے اپنے گھر بوہے ول وی، نہ پرتیا جائے
اس بے سرتی جوہ دے اندر، ہویا واسا میرا
رکھاں نالوں لمے جتھے، رکھاں دے نے سائے
شعر دی دیہی اتے ملیا، روپ خیال دا وٹنا
کیوں نہ غزلاں وچوں اڑیئے، خوشبو تیری آئے
امین خیال
No comments:
Post a Comment
Note: only a member of this blog may post a comment.