جدید پنجابی شاعری
عشق دی پوڑی چڑھیا ای نئیں
یار دا پلّہ پھڑیا ای نئیں
سِدھی ی نال یاری لائی
الف انار تے پڑھیا ای نئیں
تُوں کی جانیں روح دے دُکھڑے
تُوں کلبُوت اچ تڑیا ای نئیں
سچ بولاں تے جیبھ نئیں رہندی
جھُوٹ تے جاندا گھڑیا ای نئیں
پیار دا ناں کیوں لیندا جیہڑا
ہِجر دی اگ اچ سڑیا ای نئیں
کاہدا فیر نگینہ جے کر
یار دی مُندری جڑیا ای نئیں
لبھ لبھ لکھّاں پتھّر پُوجے
من مندر وِچ وڑیا ای نئیں
لُٹ مار کے حج تے کیتے
اک گُناہ وی جھڑیا ای نئیں
تُوں تے یار شیطان توں بھیڑا
اپنے حق لئی لڑیا ای نئیں
بڑا نثار دلیر سی بن دا
سچّی گل تے اڑیا ای نئیں
نثار احمد
No comments:
Post a Comment
Note: only a member of this blog may post a comment.